Здружението на новинарите на Македонија (ЗНМ) реагираше на непримерната комуникација на претседателот на опозициската партија ВМРО-ДПМНЕ Христијан Мицкоски, во која јавно се омаловажуваат новинари што известуваат за билатералниот спор со Бугарија:
„Тој во својот партиски говор на митингот што се одржа во саботата пред Владата истакна: „Нè лажеа дека не преговараат за јазикот, дека не преговараат за идентитетот, а денес оние платени, за волја на вистината, малкумина владини пера, преку мали колумнички, нè убедуваат дека триумфирале по којзнае кој пат“.
Укажуваме дека јавното етикетирање на новинарите и на медиумите, посебно од страна на претседатели на политички партии, негативно се одразува на слободата на медиумите и придонесува за цензура и самоцензура“, се вели во соопштението на ЗНМ.
ЗНМ укажува дека Мицкоски ги поттикнувал партиските симпатизери на говор на омраза: „Вакви јавни наративи директно ги поттикнуваат партиските симпатизери да повикуваат на говор на омраза кон новинари и медиумски работници на социјалните мрежи. Агресивниот говор на омраза и заканите кон новинари може да резултираат и со дела од омраза, со што дополнително може да се загрози безбедноста на новинарите, а со тоа и правото на информирање на граѓаните да примаат информации за важни општествени процеси“.
ЗНМ потсетува дека уредничката и новинарската независност е неприкосновена и таа не смее да биде под притисок на политичарите бидејќи на тој начин се влијае јавниот интерес да се претвори во партиски, а тоа да биде на штета на граѓаните и на нивното право на информирање.
Ова не е прв пат ЗНМ да го осудува Мицкоски за етикетирање на новинари и медиуми.
Скорешни коментари