Екипа на Алсат во Г.Свиларе спречена да ја врши својата работа, ЗНМ бара итна реакција од институциите, ИМА со осуда за инцидентот

Вчера напладне новинарската екипа на телевизијата Алсат во состав Мелихате Рустеми (новинарка) и Бојан Костовски (снимател) биле спречени да ја вршат својата работа, соопшти Здружението на новинарите на Македонија. Екипата пристигнала во селото Горно Свиларе(Општина Сарај) по претходно добиени информации дека жителите немаат вода за пиење. После неколку минути снимање, се појавило лице во цивилна облека кое агресивно викајќи им забранил да снимаат.

Како што се вели во реакцијата на ЗНМ, лицето им дало на новинарите насока да го напуштат селото за 5 минути и образложение дека тој е главен таму, причина заради која екипата на Алсат треба да ги спроведе неговите наредби, велејќи дека нивните информации за недостиг на вода не се точни, но без да остави можност да се провери. Притоа, барал од новинарката дозвола за снимање.

Новинарката Рустеми заедно со снимателот Костовски, после образложението дека за снимање на јавни површини не  е потребна дозвола од надлежните институции и неколку минутен вербален конфликт, после појавата на уште неколку лица, а со цел да избегнат поголем конфликт биле принудени да го напуштат просторот, јавната површина и да најдат друго место за снимање.

Екипата на Алсат го снимила целиот вербален конфликт, кој пак бил емитуван и во вчерашните вести на телевизијата.

ЗНМ посочува дека ваквиот третман кон новинарите придонесува кон нивна цензура. Токму затоа, Здружението на новинарите бара од надлежните институции да се преземат конкретни мерки против лицето, со цел во иднина да не се случува попречување на правото на работа на новинарите и правото на информирање на граѓаните.

Институтот за медиуми и аналитика ИМА го осудува овој инцидент, и се приклучува кон барањата на новинарскиот еснаф за итна институционална реакција и преземање мерки, не само во овој случај, туку во сите случаи во кои новинарите се спречуваат да ја вршат својата работа, со што се загрозува слободата на медиумите како еден од основните столбови на секој демократски систем.