Пендаровски, медиумски здруженија и активисти нajостро го осудија нападот врз новинарот Зоран Божиновски

Претседателот Стево Пендаровски нajостро го осуди нападот врз новинарот Зоран Божиновски:
„Република Северна Македонија е правна држава во која се штитат човековите права и слободи, затоа повикувам за ефикасна истрага на овој случај. Неприфатливо е насилничко однесување кон кој било граѓанин во Република Северна Македонија, без разлика на професијата.“

Зоран Божиновски во фејсбук пост објави дека со чинот на негово претепување е испратена порака дека никој не е безбеден:

„Жив сум, со повреди кои ќе поминат, семејството ми е вознемирено и потресено, на станарите од десетина станбени згради во моето соседство синоќа им е испратена порака:
,,НЕ СТЕ БЕЗБЕДНИ, ОВА Е НЕБЕЗБЕДНА ДРЖАВА, СЕКОЈ МОЖЕ ДА ВЕ НАЧЕКА ПРЕД ВАШИОТ ВЛЕЗ И ДА ВЕ ПРЕТЕПА, НЕ ОЧЕКУВАЈТЕ ПОДОБРО ОД ОВА!!!,,“

 

Здружението на новинарите на Македонија (ЗНМ) и Советот за етика во медиумите (СЕММ) го осудија насилството и побараа итна реакција од МВР да спроведе брза и ефикасна истрага: „Го осудуваме секој облик на физичко насилство и потенцираме дека физичкиот напад претставува кривично дело. Апелираме МВР и ОЈО, итно да ги истражат и процесираат ваквите напади со цел да ги казнат оние кои го прекршуваат законот, но и да превенираат евентуални вакви кривични дела во иднина“, велат од ЗНМ и СЕММ.

ЗНМ и СЕММ бараат итна истрага за нападот врз сопственикот на портaлот „Буре весник“

Нападот врз Зоран Божиновски го осудија и медиумските активисти и новинари Петрит Сарачини и Зоран Бојаровски.

„Нема и не смее да има никакво оправдување за физичкиот напад врз Зоран Божиновски… посегање по насилство не смее да се дозволи и треба да се казнува во секоја демократска држава! Без оглед за кого се работи, насилството врз кој било граѓанин е недозволиво! На потег се институциите, треба брзо да го расветлат овој случај и да ги пронајдат и казнат насилниците!“, истакна Сарачини.

 

„МВР и ОЈО овој крвнички напад врз новинарот Божиновски треба да го расветлат веднаш, и злосторите да ги соочат со правдата“, истакна Бојаровски.