Instituti për Media dhe Analitikë IMA me TV emisionin “Poligraf”, i realizuar në bashkëpunim me TV Alsat, është fitues i çmimit vjetor “Ilija Zhupanoski” nga Fondacioni për Internet dhe Shoqëri “Metamorfozis”.
Çmimi “Ilia Zhupanoski” u ndahet gazetarëve, organizatave të shoqërisë civile dhe individëve që kontribuojnë në ballafaqimin me dezinformatave në vend. Autorët e emisionit “Poligraf”, Petrit Saraçini dhe Zharko Trajanoski e morën çmimin në kategorinë për punimin më të mirë gazetaresk, përkatësisht punim ekspert i përgatitur nga organizata të shoqërisë civile dhe individë.
Emisioni javor televiziv “Poligraf” për ekspozimin e dezinformatave dhe lajmeve të pasakta u prodhua në bashkëpunim me televizionin kombëtar Alsat dhe me mbështetjen e Ambasadës së SHBA-ve në Maqedoninë e Veriut. Emisioni përfshiu 2 sezone me gjithsej 48 episode.
“Poligraf” renditej në top tre emisionet më të shikuara të TV Alsat, gjë që dëshmon suksesin e projektit dhe tregon se publiku është i interesuar për përmbajtje që zbulojnë dezinformatat. Krahas kësaj, mbi 600 përmbajtje të storieve të “Poligraf”-it janë ribotuar nga rreth 20 portale të njohura në gjuhën maqedonase dhe shqipe.
Përveç çmimit për IMA dhe emisionin “Poligraf”, në kategorinë e dytë – Përmbajtje multimediale edukative e përgatitur nga të rinjtë e moshës 18 deri në 28 vjeç, çmimi iu dha gazetarit Ardit Ramadani për “Histeria mediatike për gjininë e Imane Helifit ka rrënjët e saja në Rusi, mediat ranë sërish në grackën e Rusisë”. Gjithashtu, gazetarja Vesna Kollovska u vlerësua për kontributin e saj të veçantë në serialin edukativ “Dezinformatat dhe përhapja e teorive të konspiracionit”.
Çmimet u ndanë me ceremoni në kuadër të edicionit të njëzetë të konferencës E-society.mk “Transformimi digjital për një jetë më të mirë”, organizuar nga Fondacioni për Internet dhe Shoqëri “Metamorfozis”.


