Instituti për Media dhe Analitikë IMA iu bashkua Rrjetit për Arsimim Mediatik të Republikës së Maqedonisë së Veriut.
Rrjeti për Arsimim Mediatik është krijuar me qëllim që të lehtësojë bashkëpunimin ndërmjet subjekteve të ndryshme në vend që punojnë për të ngritur nivelin e arsimimit mediatik të të gjithë qytetarëve dhe për të kontribuar në rezultate më të mira dhe më të qëndrueshme të projekteve.
I themeluar në vitin 2017, me iniciativën e Agjencisë për Shërbime Mediatike Audio dhe Audiovizuele, Rrjeti tani ka 87 anëtarë, ku përfshihen institucione publike dhe ministri, organizata të shoqërisë civile, institucione arsimore, media dhe individë. Përveç kësaj, Rrjeti është pjesë e EMIL – Grupi i Punës i EPRA (Platforma Evropiane e Organeve Rregullatore).


