Publikim: “Si raportuan mediat për eurointegrimet para dhe pas zgjedhjeve (analiza)”

 

Publikimi: “Si raportuan mediat për eurointegrimet para dhe pas zgjedhjeve (analiza)”, sjell analiza autoriale nga Sllobodanka Jovanovska – gazetare dhe redaktore e politikës së jashtme dhe ish korrespondente nga Brukseli, dhe prof. Sefer Tahiri – profesor universitar i gazetarisë dhe komunikimit publik, autorë të shquar me përvojë shumëvjeçare mediatike, që përfshin raportime, hulumtime dhe analiza lidhur me integrimin evropian të vendit dhe raportimin mediatik për këto procese.

Qëllimi i analizave është të detektojë narrativat kryesore dhe cilësinë e raportimit mediatik mbi procesin e eurointegrimeve para dhe pas zgjedhjeve presidenciale dhe parlamentare të mbajtura në prill dhe maj të vitit 2024.

Përfundim i përbashkët i analizave është se kjo temë ka qenë ndër më dominueset para zgjedhjeve dhe në fushatën zgjedhore, e fokusuar kryesisht në qëndrimet “pro” dhe “kundër” ndryshimeve kushtetuese, të cilat janë kusht për vazhdimin e negociatave për anëtarësim në BE. Në këtë konfrontim, i cili rriti polarizimin dhe ndarjet në shoqëri në vija politike dhe etnike, më të suksesshme rezultuan opsionet politike që imponuan narrativat se ndryshime kushtetuese nuk do të ketë, se ato janë “shantazh” dhe “diktat bullgar” dhe se vendi është viktimë i kushtëzimit joparimor nga BE-ja.

Pas zgjedhjeve, intensiteti i raportimit për integrimet evropiane ishte shumë më i ulët dhe u përqendrua kryesisht në ngjarje të caktuara dhe transmetim të deklaratave nga zyrtarë të lartë politikë, ku në shumicën e mediave vërehet raportim për aspekte të imponuara nga aktorët politikë dhe mungesë e një qasjeje analitike dhe kritike – veçanërisht për atë që u premtua gjatë zgjedhjeve dhe për atë që u deklarua dhe u bë pas tyre. Ngecja në integrimet evropiane dhe mungesa e zhvillimeve të reja rezulton edhe me rritje të euroskepticizmit, si dhe me ngopje dhe ulje të interesimit të mediave dhe qytetarëve për këtë temë.

Publikimi është pjesë e aktiviteteve të Institutit për Media dhe Analitikë IMA, të mbështetura nga Fondi Evropian për Demokraci (European Endowment for Democracy) nga Brukseli, dhe është një kontribut në realizimin e angazhimeve të IMA-s për avancimin e demokracisë dhe të drejtave të njeriut, përmes bashkëpunimit me institucionet, organizatat e shoqërisë civile dhe mediat për përballje me dëmet nga polarizimi, gjuha e urrejtjes, dezinformatat dhe sulmet ndaj mendimtarëve kritikë në media dhe në komunikimin publik.

Publikimi mund të zbritet këtu:

Si raportuan mediat për eurointegrimet para dhe pas zgjedhjeve (analiza)